रक्षाबंधनाच्या दिवशी वाघोलीत पावसामुळे महामार्ग ठप्प; ३ किमी वाहतूक कोंडीने नागरिक त्रस्त

पुण्यातील वाघोली परिसरात सुरू झालेल्या मुसळधार पावसामुळे पुणे नगर महामार्गावर मोठी वाहतूक कोंडी झाली आहे. रक्षाबंधनाच्या निमित्ताने नागरिक मोठ्या संख्येने बाहेर पडले आहेत, ज्यामुळे महामार्गावर वाहतुकीची स्थिती आणखीनच बिकट झाली आहे.

रस्त्यावर पाणी साचल्याने वाहनांची गती कमी झाली असून, काही ठिकाणी तीन किलोमीटरपर्यंत वाहतुकीच्या रांगा लागलेल्या आहेत. या कोंडीमुळे नागरिकांना रक्षाबंधनासाठी त्यांच्या ठिकाणी पोहोचण्यास अडचणी येत आहेत.

शहरातील अनेक भागांत सध्या मुसळधार पाऊस सुरू असून, या पावसामुळे वाहतूक कोंडीचा त्रास अधिक वाढत आहे.